Michuano ya CAF Women's Champions League 2026 imeanza rasmi jana Jumapili, Novemba 1, katika Uwanja wa Suez Canal jijini Ismailia, Misri, huku klabu itakayotwaa ubingwa ikitarajiwa kuvuna dola za Marekani 600,000. Hili ni toleo la sita la Ligi ya Mabingwa Afrika kwa Wanawake, na fainali itachezwa Jumapili, Novemba 15.
Siku ya ufunguzi haikutoa bao hata moja. FUS Rabat ya Morocco ilitoka sare ya 0-0 na Lekié Football Filles ya Cameroon, kisha wenyeji FC Masar wakawazuia mabingwa mara mbili Mamelodi Sundowns ya Afrika Kusini kwa sare nyingine ya 0-0. Matokeo hayo yameziacha timu zote nne za Kundi A zikiwa na pointi moja kila moja.
Zawadi za CAF Women's Champions League 2026
Kwa mujibu wa Shirikisho la Soka Afrika (CAF), jumla ya dola milioni 2.35 zimetengwa kwa zawadi za mashindano ya mwaka huu. Bingwa atapata dola 600,000, mshindi wa pili dola 400,000, mshindi wa tatu dola 350,000 na timu ya nne dola 300,000.
Hata timu zitakazoishia hatua ya makundi hazitaondoka mikono mitupu. Timu zitakazomaliza nafasi ya tatu kwenye makundi yao zitapata dola 200,000, na zile za mwisho dola 150,000 kila moja, hivyo klabu zote nane zitanufaika kifedha.
Zaidi ya fedha, bingwa atakata tiketi ya raundi ya pili ya kufuzu Kombe la Mabingwa la Wanawake la FIFA (FIFA Women's Champions Cup) 2027. Huko atacheza na Naegohyang WFC ya Korea Kaskazini mwezi Desemba 2026, na hatua ya mwisho ya michuano hiyo ya FIFA itafanyika Miami, Marekani, kuanzia Januari 27 hadi 31, 2027.
Masar Yaendeleza Ubabe kwa Sundowns
Sundowns, waliotwaa taji mwaka 2021 na 2023, walishindwa kulipa kisasi cha kufungwa 1-0 na Masar kwenye michuano ya mwaka 2024. Kocha Godfrey Sapula alifanya mabadiliko kadhaa kipindi cha pili, lakini ukuta wa timu ya kocha Abdelrahman Ayed ulisimama imara hadi mwisho.
Katika mchezo wa kwanza, Lekié FF, wanaoshiriki kwa mara ya kwanza, walitawala kwa kupiga mashuti mengi lakini walikosa umakini mbele ya lango la FUS Rabat. Mechi za raundi ya pili za Kundi A zitachezwa Jumatano, Novemba 4, ambapo FUS Rabat itavaana na Masar, huku Sundowns ikikutana na Lekié.
AS FAR Yaanza Kutetea Taji Dhidi ya Kawempe
Kundi B limeanza leo Jumatatu, Novemba 2. Mabingwa watetezi AS FAR ya Morocco walipangwa kucheza na Kawempe Muslim Ladies ya Uganda saa 9:00 alasiri kwa saa za Tanzania, kabla ya USFAS Bamako ya Mali kuvaana na Ampem Darkoa ya Ghana saa 12:00 jioni.
AS FAR ndiyo klabu pekee iliyoshiriki kila toleo tangu michuano hii ianze mwaka 2021. Imetwaa ubingwa mara mbili, mwaka 2022 na 2025, lakini bado haijawahi kutokea klabu iliyotetea taji hili kwa mafanikio. Mashabiki wa Tanzania wanaikumbuka AS FAR kwa kuifunga Simba Queens 1-0 katika hatua ya makundi ya mwaka 2022.
Kawempe Yabeba Bendera ya Afrika Mashariki
Kawempe Muslim Ladies ndiyo mwakilishi wa ukanda wa CECAFA na klabu ya kwanza kutoka Uganda kufuzu fainali hizi, hivyo Uganda inakuwa nchi ya 18 kuwakilishwa. Ilifuzu kwa kutwaa ubingwa wa mashindano ya kufuzu ya CECAFA yaliyofanyika Kigali, Rwanda, Agosti 2026, ikishinda mechi zote nne bila kuruhusu bao.
Katika fainali ya CECAFA, nahodha wa miaka 17, Agnes Nabukenya, alifunga bao pekee dakika ya 100 dhidi ya Kenya Police Bullets. Timu hiyo inanolewa na Ayub Khalifa Kiyingi, ambaye ameiongoza tangu mwaka 2001.
Ratiba ya Nusu Fainali na Fainali
Timu mbili za juu kutoka kila kundi zitatinga nusu fainali zitakazochezwa Novemba 11. Kinara wa Kundi A atacheza na mshindi wa pili wa Kundi B, huku kinara wa Kundi B akikutana na mshindi wa pili wa Kundi A.
Mechi ya kusaka mshindi wa tatu itachezwa Novemba 14, na fainali itapigwa Jumapili, Novemba 15, saa 12:00 jioni kwa saa za Tanzania, kwenye Uwanja wa Suez Canal.
Soma pia
Ligi ya Mabingwa Afrika Wanawake: Ampem Darkoa 3-2 Edo Queens
Arajiga CAF: Mwamuzi wa Tanzania Ateuliwa Kambi ya Waamuzi Cairo
AFCON Kila Baada ya Miaka Miwili: CAF Yarejesha Mfumo wa Zamani
